പുതുവത്സര ആഘോഷങ്ങൾക്ക് ഷാർജയിലും നിയന്ത്രണങ്ങൾ,നിയമം ലംഘിച്ചാൽ 10000 ദിർഹം പിഴ.
ഷാർജ: ജനത്തിരക്കേറിയ പുതുവത്സരാഘോഷങ്ങൾക്കു ഷാർജയിലും വിലക്ക് വീണു. കൂട്ടം കൂടിയുള്ള പാർട്ടികൾക്കും ,ഒത്തുചേരലുകൾക്കുമാണ് വിലക്ക് ഏർപ്പെടുത്തിയിരിക്കുന്നത്. ആഘോഷങ്ങളിൽ സാമൂഹ്യ അകലം കൃത്യമായി പാലിച്ചിരിക്കണം. ആളുകൾ തമ്മിൽ കുറഞ്ഞത് 4 മീറ്റർ എങ്കിലും അകലം പാലിച്ചിരിക്കണമെന്നാണ് ഷാർജ അധികൃതർ നൽകുന്ന നിബന്ധന. നിർദ്ദേശം ലന്ഘിക്കുന്നവർക്കു 10000 ദിർഹമാണ് പിഴ ചുമത്തുക. മുഴുവൻ സമയവും മാസ്ക്ക് ധരിക്കണം ,ഇടയ്ക്കിടെ കൈകൾ സാനിട്ടൈസർ ഉപയോഗിച്ചു അണുവിമുക്തമാക്കണം എന്നീ നിർദ്ദേശങ്ങളും നൽകിയിട്ടുണ്ട്. പ്രായമേറിയവരും , വിട്ടുമാറാത്ത അസുഖങ്ങൾ ഉള്ളവരും ഒത്തുചേരലുകളിൽ നിന്നും മാറി നിൽക്കണമെന്ന് ഷാർജ പോലീസ് അഭ്യർത്ഥിച്ചു. അബുദാബിയിലും ദുബായിലും ആഘോഷങ്ങൾക്കുള്ള നിയന്ത്രണങ്ങൾ കഴിഞ്ഞ ദിവസം പ്രഖ്യാപിച്ചിരുന്നു. അബുധാബിയിൽ സ്വകാര്യ ചടങ്ങുകൾക്ക് വിലക്ക് ഏർപ്പെടുത്തിയിട്ടുണ്ട്. ദുബായിൽ ഒത്തുചേരലുകളിൽ 30 പേരിൽ കൂടുതൽ പങ്കെടുക്കുന്നതിനാണ് വിലക്ക് ഏർപ്പെടുത്തിയിരിക്കുന്നത്.