ദുബായ്: രണ്ടുമാസത്തിനകം പ്രവാസികൾക്കടക്കം 20 ലക്ഷം കോവിഡ് പരിശോധന നടത്താൻ പദ്ധതി തയ്യാറാക്കി യു.എ.ഇ ആരോഗ്യമന്ത്രാലയം.പൊതുമേഖലയിലും സ്വകാര്യമേഖലയിലും ജോലി ചെയ്യുന്നവരെ ലക്ഷ്യമിട്ടാണ് വ്യാപകപരിശോധനയ്ക്ക് പദ്ധതി തയ്യാറാക്കുന്നതെന്ന് ആരോഗ്യപ്രതിരോധമന്ത്രാലയം വ്യക്തമാക്കി. സർക്കാർവക്താവ് ഡോ. അംന അൽ ശംസി കോവിഡ് ആഘാതം കുറയ്ക്കുന്നതിന് രാജ്യം സ്വീകരിച്ച നടപടികളെക്കുറിച്ച് കഴിഞ്ഞ ദിവസം നടന്ന വാർത്താ സമ്മേളനത്തിൽ വിശദീകരിച്ചു.

സർക്കാർജീവനക്കാർക്കുപുറമേ ഹോട്ടൽ, മാൾ ജീവനക്കാർ, ടാക്സിഡ്രൈവർമാർ എന്നിവർക്കിടയിലും വ്യാപകപരിശോധന നടത്തും. സമൂഹം കോവിഡ് മുക്തമായി ആരോഗ്യത്തോടെയിരിക്കുക എന്നതാണ് ലക്ഷ്യം. കോവിഡ് പോസിറ്റീവ് കേസുകൾ ഉണ്ടെങ്കിൽ അവർക്കാവശ്യമായ ചികിത്സ നൽകും. മുൻപത്തെ രണ്ടാഴ്ചയിൽനിന്ന് വ്യത്യസ്തമായി കഴിഞ്ഞ വാരാന്ത്യത്തിൽ കോവിഡ് രോഗികളുടെ എണ്ണത്തിൽ ചെറിയ വർധനയുണ്ടായി. ഈവർധന ആശങ്കയുണ്ടാക്കുന്നുണ്ട്. പ്രതിരോധനടപടികളും മാർഗനിർദേശങ്ങളും പാലിക്കാത്ത ചിലരുടെ അശ്രദ്ധയാണ് കഴിഞ്ഞദിവസങ്ങളിലെ വർധനയ്ക്ക്‌ കാരണം.വീടുകളിലിരിക്കുമ്പോഴും യാത്ര ചെയ്യുമ്പോഴും ഓഫിസുകളിൽ ജോലി ചെയ്യുമ്പോഴും മാർഗനിർദേശങ്ങൾ പാലിക്കണം.