ഭക്ഷ്യസുരക്ഷയുടെ പ്രാധാന്യമറിയിച്ചുകൊണ്ട് മുനിസിപ്പാലിറ്റി അധികൃതർ വിദ്യാർഥികൾക്കിടയിൽ ബോധവത്കരണവും നടത്തും. ഇതിനായി ‘മൈ സ്‌കൂൾ ഫുഡ്’ എന്നപേരിൽ ഡിജിറ്റൽ പ്ലാറ്റ്ഫോം വഴിയും വിദ്യാർഥികൾക്ക് അറിവ് പകരും. ഭക്ഷ്യസുരക്ഷയുടെ അംബാസഡർമാരായി വിദ്യാർഥികളും യുവജനങ്ങളും മാറേണ്ടതുണ്ടെന്നും ദുബായ് മുൻസിപ്പാലിറ്റി എൻവയൺമെന്റ്, ഹെൽത്ത് ആൻഡ് സേഫ്റ്റി ഏജൻസി ആക്ടിങ് സിഇഒ ഡോ.നസീം മുഹമ്മദ് റാഫി പറഞ്ഞു.വിവിധ വിനോദപരിപാടികളിലൂടെയും വിദ്യാലയങ്ങൾക്കും വിദ്യാർഥികൾക്കും ഭക്ഷ്യസുരക്ഷാ അവബോധം നൽകും. ഭക്ഷണപദാർഥങ്ങൾ നിശ്ചിത താപനിലയിൽ സൂക്ഷിക്കേണ്ടതിന്റെ ആവശ്യകതയും എങ്ങനെ സൂക്ഷിക്കണം എന്നതടക്കമുള്ള കാര്യങ്ങളും ബോധ്യപ്പെടുത്തും. പരിസ്ഥിതിക്ക് ഇണങ്ങുന്നവിധം ആരോഗ്യകരമായ പോഷകാഹാരങ്ങൾ നൽകുന്നതിനെക്കുറിച്ചുള്ള ന്യൂട്രീഷ്യൻ ഇൻ ചാർജ് (എൻഐസി) പരിപാടിയും ദുബായ് മുനിസിപ്പാലിറ്റി നടപ്പാക്കിയിട്ടുണ്ട്. ഇതുവഴി പോഷകാഹാരങ്ങളെക്കുറിച്ചുള്ള അവബോധം, ആരോഗ്യകരമായ ഭക്ഷണശീലങ്ങൾ പ്രോത്സാഹിപ്പിക്കൽ, ഭക്ഷണങ്ങളുടെ ഗുണനിലവാരം പരിശോധിക്കൽ, ആശങ്കകൾ പരിഹരിക്കൽ, വിദ്യാലയ കാന്റീൻ ജീവനക്കാർക്കുള്ള പരിശീലനം എന്നിവയുമുണ്ടാകും. സ്‌കൂൾ ഓഫ് റിസർച്ച് സയൻസ് വിഭാഗത്തിലെ ആരോഗ്യ-ഭക്ഷ്യസുരക്ഷാ സ്‌പെഷ്യലിസ്റ്റ് ആയ ജുമാന ഷംസുദ്ദീനാണ് എൻഐസിയുടെ ചുമതല. വിദ്യാർഥികളുടെ ആഗ്രഹപ്രകാരം ആഴ്ചയിലൊരിക്കൽ പ്രത്യേക വിഭവം വിതരണംചെയ്യുമെന്നും ജുമാന ഷംസുദ്ദീൻ പറഞ്ഞു.