അബുദാബി:  സന്ദര്‍ശകര്‍ക്ക് വിരുന്നൊരുക്കി അബുദാബി ഇന്ത്യാ സോഷ്യല്‍ ആൻഡ് കൾച്ചറൽ സെന്ററില്‍ (ഐ എസ് സി )  ഇന്ത്യാ ഫെസ്റ്റിന് തുടക്കമായി. വൈവിധ്യമാർന്ന കലാപരിപാടികളും ഭക്ഷണ ശാലകളും വിവിധ ബിസിനസ് സ്ഥാപനങ്ങളുടെ സ്റ്റാളുകളും വിദ്യാർത്ഥികളുടെ ശാസ്ത്ര പ്രദർശന സ്റ്റാളുകളും തന്നെയാണ് പതിമൂന്നാമത് ഇന്ത്യ ഫെസ്റ്റിന്റെ ഏറ്റവും പ്രധാന ആകര്‍ഷണങ്ങള്‍.

ഐ എസ് സി  പ്രസിഡന്റ് ജയറാം റായ്യ് ടെ അധ്യക്ഷതയിൽ നടന്ന ആഘോഷ പരിപാടികൾ യു എ ഇയിലെ ഇന്ത്യൻ സ്ഥാനപതി സഞ്ജയ് സുധീർ നിലവിളക്കുകൊളുത്തി ഉത്ഘാടനം ചെയ്തു. ചടങ്ങിൽ ഐ എസ് സി, ജനറൽ സെക്രട്ടറി രാജേഷ് ശ്രീധരൻ, ട്രഷറർ ദിനേശ് പൊതുവാൾ, വിനോദവിഭാഗം സെക്രട്ടറി അരുൺ ആൻഡ്രു വർഗീസ്, വൈസ് പ്രസിഡന്റ് ആൻഡ് ഇന്ത്യ ഫെസ്റ്റ് ജനറൽ കൺവീനർ  കെ.എം സുജിത്ത് എന്നിവർ പ്രസംഗിച്ചു. മുഖ്യ പ്രയോജകരായ ഐ സി എൽ ഫിൻ കോർപ്പ് ഇൻവെസ്റ്റ്മെന്റ് മാനേജിങ് ഡയറക്ടർ  കെ.ജി.അനിൽകുമാർ, ലുലു എക്സ്ചേഞ്ച്  മാർക്കറ്റിംഗ് മാനേജർ അസിം ഉമർ, ജെമിനി ബിൽഡിംഗ് മെറ്റീരിയൽസ് മാനേജിങ് ഡയറക്ടർ കെ പി ഗണേഷ് ബാബു, മെഡിയോർ ഹോസ്പിറ്റൽ ഡയറക്ടർ ഓഫ് ഓപ്പറേഷൻ ഡോ.തേജ രാമ, ട്രാൻ ടെക്ക് ഗ്രൂപ്പ് ചെയർമാൻ റഫീഖ് കയനയിൽ, സൈഫി രൂപവലാ കമ്മ്യൂണിറ്റി പോലീസ് കാപ്റ്റൻ തമീമി തുടങ്ങിയവർ ചടങ്ങിൽ പങ്കെടുത്തു.

മൂന്ന് ദിവസത്തെ മേളയുടെ ആദ്യദിനത്തിൽ  രഞ്ജിനി ജോസ്, നിരഞ്ച് സുരേഷ്, പ്രദീപ് ബാബു എന്നിവർ ഒരുക്കിയ സംഗീത വിരുന്ന്  ഫെസ്റ്റിനെ മികവുറ്റതാക്കി. വൈവിധ്യമാർന്ന ഇന്ത്യൻ നൃത്ത പരിപാടികൾ ആയിരുന്നു മറ്റൊരു ആകർഷണം. രണ്ടാം ദിനമായ ഇന്ന്  ജനുവരി 25 ശനിയാഴ്ച രാത്രി റിയാലിറ്റി ഷോ താരങ്ങളായ  വൈഭവ് ഗുപ്ത, അനന്യ പാൽ എന്നിവർ നയിക്കുക മ്യൂസിക് ഷോ അരങ്ങേറും.

അബുദാബിയിലെ പ്രമുഖ റെസ്റ്റോറന്റുകളുടെയും സംഘടനകളുടെയും ഭക്ഷണശാലകള്‍ മേളയിലൊരുക്കിയിരുന്നു. സ്റ്റാളുകളില്‍ ആഭരണങ്ങള്‍, വസ്ത്രങ്ങള്‍, ഫാഷന്‍ ഉത്പന്നങ്ങള്‍, പുസ്തകങ്ങള്‍ എന്നിവയെല്ലാം സന്ദര്‍ശകര്‍ക്കായൊരുക്കിയിട്ടുണ്ട്. കശ്മീർ മുതൽ കന്യാകുമാരി വരെ നീളുന്ന ഇന്ത്യയുടെ വിവിധ ഭാഗങ്ങളിൽനിന്നുള്ള തനി നാടൻ വിഭവങ്ങൾ ഒരിടത്ത് സമ്മേളിച്ചതായിരുന്നു ഇന്ത്യ ഫെസ്റ്റിന്റെ മറ്റൊരു വൈവിധ്യം. മലയാളികളുടെ കപ്പയും മത്തിക്കറിയും കരിമീനും ഉപ്പിലിട്ട മാങ്ങയുമെല്ലാം ഒരുക്കിയിരുന്നു. വിദ്യാർഥികളുടെ എക്സിബിഷനും ഒരുക്കിയിട്ടുണ്ട്. പത്ത് ദിർഹത്തിന്റെ പ്രവേശന ടിക്കറ്റ് എടുത്ത് എത്തുന്നവരിൽനിന്ന് നറുക്കെടുപ്പിലൂടെ തിരഞ്ഞെടുക്കപ്പെടുന്ന മെഗാ വിജയിക്ക് 100 ഗ്രാം സ്വർണമാണ് സമ്മാനം. കൂടാതെ 5 പേർക്കു വീതം 8 ഗ്രാം സ്വർണ നാണയം, ടെലിവിഷൻ, സ്മാർട്ട് ഫോൺ, സ്മാർട്ട് വാച്ച്, എയർ ഫ്രയർ തുടങ്ങി വിലപിടിച്ച മറ്റു സമ്മാനങ്ങളും നൽകുന്നുണ്ട്. സന്ദർശകർക്കായി വിശാലമായ പാർക്കിങ് സൗകര്യവും ഒരുക്കിയിട്ടുണ്ട്. അവസാന ദിനമായ നാളെ വൈവിധ്യമാർന്ന കലാ പരിപാടികളും നറുക്കെടുപ്പും നടക്കും.