അബുദാബി: അന്തരിച്ച കേരള സോഷ്യൽ സെൻ്റർ അംഗവും മുൻ ഓഡിറ്ററുമായ  രജിലാലിൻ്റെ നിര്യാണത്തിലുള്ള അനുശോചന യോഗം കേരളാ സോഷ്യൽ സെന്റർ, ശക്തി തിയറ്റേഴ്‌സ് അബുദാബി, യുവകലാസാഹിതി, ഫ്രണ്ട്‌സ് ADMS എന്നീ സംഘടനകൾ സംയുക്‌തമായി സംഘടിപ്പിച്ചു. അബുദാബി ബനിയാസിലുണ്ടായ വാഹനാപകടത്തിൽ ആയിരുന്നു കണ്ണൂർ ഒഴപ്രം സ്വദേശി റജിലാൽ കോക്കാടൻ (50) വിടവാങ്ങിയത് . അൽ മൻസൂരീ  എഞ്ചിനീയറിംഗ്  കമ്പനിയിൽ ഓപ്പറേഷൻ മാനേജരായി ജോലി ചെയ്തിരുന്ന റജിലാൽ ജോലികഴിഞ്ഞു തിരിച്ചുവരുന്നതിനിടയിലാണ് അപകടം സംഭവിച്ചത്. രജിലാൽ എസ്എഫ്ഐ കണ്ണൂർ മുൻ ജില്ലാ കമ്മിറ്റി അംഗവും കണ്ണൂർ എഞ്ചിനീയറിങ്ങ് കോളേജ് ചെയർമാനായിരുന്നു.ഒമാനിലായിരിക്കുമ്പോൾ ഒമാൻ കൈരളിയുടെ ഭാരവാഹി കൂടിയായിരുന്നു. കേരള സോഷ്യൽ സെന്ററിന്റെ കഴിഞ്ഞവർഷത്തെ ഓഡിറ്ററായിരുന്ന അദ്ദേഹം ശക്തി തിയറ്റേഴ്‌സ് അബുദാബിയുടെ സജീവപ്രവർത്തകനാണ്. ഭാര്യ: മായ റജിലാൽ. കേരള സോഷ്യൽ സെന്ററിന്റെ വനിതാ കമ്മിറ്റി അംഗമാണ്. ശക്തി തിയറ്റേഴ്‌സ് ജനറൽ സെക്രട്ടറി എ എൽ  സിയാദ് സ്വാഗതം പറഞ്ഞ യോഗത്തിനു കെ എസ് സി  പ്രസിഡന്റ് എ കെ ബീരാൻ കുട്ടി അധ്യക്ഷത  വഹിച്ചു. അനുശോചന പ്രമേയം കെ എസ് സി  ജനറൽ സെക്രട്ടറി  നൗഷാദ് യൂസഫ്‌ അവതരിപ്പിച്ചു. തുടർന്ന് വിവിധ സംഘടനകളെ  പ്രതിനിധീകരിച്ചു  കെ വി  ബഷീർ (ശക്തി തിയറ്റേഴ്‌സ് പ്രസിഡന്റ്), റോയ് വര്ഗീസ് (യുവകലാസാഹിതി പ്രസിഡന്റ്), ഗഫൂർ എടപ്പാൾ (ഫ്രണ്ട്സ് ADMS പ്രസിഡന്റ്), നാസർ വിളഭാഗം (ഐ എസ് സി  സാഹിത്യ വിഭാഗം സെക്രട്ടറി),അഡ്വക്കേറ്റ് അൻസാരി (കെ എസ് സി  ഫിനാൻസ് കമ്മിറ്റി കൺവീനർ) എന്നിവർ അനുശോചനം രേഖപ്പെടുത്തി.