അബുദാബി : എമിറേറ്റിലെ 27 പാർക്കുകളിലെ 253 സ്ഥലങ്ങളിൽ ബാർബിക്യു ചെയ്യാൻ സൗകര്യമൊരുക്കിയിട്ടുണ്ടെന്ന് അബുദാബി മുനിസിപ്പാലിറ്റി അധികൃതർഅറിയിച്ചു. അനുമതിയുള്ള പാർക്കുകളിൽ മാത്രമേ ബാർബിക്യു ചെയ്യാൻപാടുള്ളൂ. അബുദാബി ദ്വീപിൽ 15 പാർക്കുകളിലും ഖലീഫ സിറ്റിയിൽ 12 പാർക്കുകളിലും ബാർബിക്യുവിന് അനുമതിയുണ്ട്. പാർക്കുകളിൽ ഒട്ടേറെ കോൺക്രീറ്റ് ബാർബിക്യു സംവിധാനങ്ങൾ മുനിസിപ്പാലിറ്റി സ്ഥാപിച്ചിട്ടുണ്ട്. പൂന്തോട്ടങ്ങൾക്കും മറ്റ് ഹരിതയിടങ്ങൾക്കും ദോഷം വരുത്താതിരിക്കാൻ ബാർബിക്യുവിനുശേഷം മാലിന്യങ്ങളും കരിക്കട്ടകളും നീക്കംചെയ്യണം. മാലിന്യമിടാൻ പ്രത്യേകസൗകര്യങ്ങളും മുനിസിപ്പാലിറ്റി ഒരുക്കിയിട്ടുണ്ട്.സന്ദർശകർക്ക് മികച്ചസൗകര്യങ്ങളും സേവനങ്ങളും നൽകുന്നതിനാണ് ബാർബിക്യു ചെയ്യാനുള്ള സ്ഥലങ്ങളുടെ എണ്ണവും വർധിപ്പിച്ചത്. പൊതുസുരക്ഷയും ശുചിത്വവും ഉറപ്പാക്കുന്നതിന് നിയുക്തപ്രദേശങ്ങളിൽ മാത്രം ബാർബിക്യു ചെയ്യണമെന്ന് കർശനനിർദേശമുണ്ട്. നിയമലംഘനങ്ങൾക്ക് കടുത്തപിഴ ലഭിക്കും. ബോധവത്കരണത്തിനായി പ്രത്യേകസുരക്ഷാ കാമ്പയിനും അബുദാബി മുനിസിപ്പാലിറ്റി ആരംഭിച്ചു. ‘ബാർബിക്യു ആസ്വദിക്കൂ, പ്രദേശം സംരക്ഷിക്കൂ’ എന്ന പ്രമേയത്തിലാണ് കാമ്പയിൻ. എല്ലാ പാർക്കുകളിലും വിനോദമേഖലകളിലുമെത്തി അധികൃതർ പൊതുജന അവബോധംവർധിപ്പിക്കും. ശൈത്യകാലത്ത് വിവിധ വിനോദപ്രവർത്തനങ്ങൾക്കായും വൈകുന്നേരങ്ങൾ ആസ്വദിക്കാനായും ഒട്ടേറെപ്പേരാണ് പാർക്കുകളിൽ എത്തുന്നത്.