വിനോദ കേന്ദ്രങ്ങളും, ഗെയിമിംഗ് കേന്ദ്രങ്ങളും പുനരാരംഭിക്കുന്നതിനുള്ള സുരക്ഷാ നിർദ്ദേശങ്ങൾ പുറത്തിറക്കി.
അബുദാബി : എമിറേറ്റിലെ വിനോദ കേന്ദ്രങ്ങൾ, ഗെയിമിംഗ് ഹാളുകൾ എന്നിവയുടെ പ്രവർത്തനങ്ങൾ പുനരാരംഭിക്കുന്നതിന് അബുദാബി ഡിപ്പാർട്മെന്റ് ഓഫ് ഇക്കണോമിക് ഡെവലപ്മെന്റ് മാർഗനിർദ്ദേശങ്ങൾ പുറത്തിറക്കി. അബുദാബിയിലെ ഷോപ്പിംഗ് മാളുകൾ, വാണിജ്യ കേന്ദ്രങ്ങൾ എന്നിവക്കകത്തും, പുറത്തും പ്രവർത്തിക്കുന്ന വിനോദ കേന്ദ്രങ്ങൾക്ക് പുതിയ തീരുമാനം ബാധകമാണ്. കർശനമായ ആരോഗ്യ സുരക്ഷാ മാനദണ്ഡങ്ങൾക്ക് വിധേയമായാണ് വിനോദ കേന്ദ്രങ്ങൾക്ക് പ്രവർത്തിക്കാൻ അനുമതി നൽകുന്നത്. സമൂഹത്തിന്റെ സുരക്ഷ ഉറപ്പാക്കുന്നതിനായുള്ള, അബുദാബി ദുരന്ത നിവാരണ അതോറിറ്റിയുടെ നിർദ്ദേശങ്ങൾക്കനുസരിച്ചാണ് കേന്ദ്രങ്ങൾക്ക് പ്രവർത്തനാനുമതി നൽകുക. കേന്ദ്രങ്ങൾക്ക് 60 ശതമാനം ശേഷിയിലാണ് പ്രവർത്തനങ്ങൾ ആരംഭിക്കാൻ അനുമതി നൽകുന്നത്. പുനരാരംഭിക്കുന്നതിൻറെ ഭാഗമായി കേന്ദ്രങ്ങളിൽ നടപ്പിലാക്കേണ്ട സുരക്ഷാ നിർദ്ദേശങ്ങൾ ഡിപ്പാർട്മെന്റ് ഓഫ് ഇക്കണോമിക് ഡെവലപ്മെന്റ് നൽകി.
# കേന്ദ്രങ്ങളിൽ ദിനവും അണുവിമുക്തമാകുന്നതിനുള്ള നടപടികൾ ഉറപ്പാക്കേണ്ടതാണ്.
# പണമിടപാടുകൾക്കായി കഴിയുന്നതും ഡിജിറ്റൽ സംവിധാനങ്ങൾ പ്രോത്സാഹിപ്പിക്കണം.
# കേന്ദ്രങ്ങളിലെത്തുന്ന മുഴുവൻ ആളുകളും 2 മീറ്റർ എങ്കിലും സമൂഹ അകലം പാലിക്കുന്നുണ്ടെന്ന് ഉറപ്പാക്കണം.
# എല്ലാ ജീവനക്കാർക്കും കോവിഡ് -19 പരിശോധനകൾ നടത്തേണ്ടതാണ്.
# മുഴുവൻ ജീവനക്കാരുടെയും ശരീരോഷ്മാവ് കൃത്യമായ ഇടവേളകളിൽ പരിശോധിച്ച് രേഖപ്പെടുത്തണം.
# കേന്ദ്രങ്ങളിലെ മുഴുവൻ ഉപകരണങ്ങളും, കുട്ടികൾ സ്പർശിക്കാൻ ഇടയാകുന്ന പ്രതലങ്ങൾ എന്നിവയും കൃത്യമായി അണുവിമുക്തമാക്കണം.
# കുട്ടികൾക്കായുള്ള പ്ലാസ്റ്റിക് ബോളുകൾ ഉപയോഗിക്കുന്ന കളിസ്ഥലങ്ങളിൽ 30 ശതമാനം പേർക്ക് മാത്രമേ ഒരേ സമയം അനുവാദം നൽകാവൂ. ഇത്തരം സ്ഥലങ്ങൾ ഓരോ മണിക്കൂർ ഇടവിട്ട് അണുവിമുക്തമാക്കേണ്ടതാണ്.
